ભાજપના ઉમેદવારે મોબાઈલ ઉપર કોંગ્રેસના ઉમેદવારને ધમકાવ્યા

મહેસાણા,તા.22

વિજાપુર તાલુકામાં મહેસાણા જિલ્લા પંચાયતની એક બેઠક ઉપર ચુંટણી લડી રહેલા ભાજપના ઉમેદવારે તેમના વિસ્તારમાં સમાવિષ્ટ તાલુકા પંચાયતની બેઠક પર કોંગ્રેસના ઉમેદવારને મોબાઈલ ઉપર આપેલી ધમકીનો ઓડીયો વાયરલ થતાં વિવાદ સર્જાયો છે. 

મહેસાણા જિલ્લામાં અત્યારે પંચાયત અને નગરપાલિકાની ચુંટણીનો ધમધમાટ જોવા મળે છે. સ્થાનિક સ્વરાજ્યની ચુંટણી લડી રહેલા રાજકીય પક્ષોના ઉમેદવારો અને અપક્ષ ઉમેદવારો ચુંટણી જીતવા અવનવા નુસખા અજમાવી રહ્યા છે. ઠેરઠેર ઉમેદવારો અને તેમના સમર્થકો મતદારો સુધી પહોંચવા લોકસંપર્ક કરી રહ્યા છે. ેતવામાં સોમવારે વિજાપુર તાલુકામાં વાયરલ થયેલ એક ઓડીયો ક્લીપે વિવાદનો મધપૂડો છંછેડયો છે. જેમાં સાંભળવા મળતી વાતચીતમાં મહેસાણા જિલ્લા પંચાયતની વિજાપુર તાલુકામાં આવેલી એક બેઠક ઉપર ચુંટણી લડી રહેલા ભાજપના ઉમેદવારે તેમના મતવિસ્તારમાં સમાવિષ્ટ વિજાપુર તાલુકા પંચાયતની બેઠક ઉપર ચુંટણીના મેદાનમાં ઝુંકાવનાર કોંગ્રેસના એક ઉમેદવારને તેમના પ્રચારના તોરણો ઉતારી લેવાનું જણાવી ઘર બચાવવું છે કે નહી તેવું કહીને ધમકાવ્યા હોવાનું ફલીત થઈ રહ્યું છે. આ વિવાદાસ્પદ ઓડીયો ક્લીપ સોશ્યલ મિડીયામાં વાયરલ થતાં રાજકીય વર્તુળોમાં અનેકવિધ તર્ક-વિતર્કો સર્જાયા છે.

from Gujarat News - Gujarat Samachar : World's Leading Gujarati Newspaper https://ift.tt/37EcaYY