ગુનેગારી અટકાવવા બોગસ બિલિંગ માટે સિવિલને બદલે ક્રિમીનલ કલમો લગાવવી જોઇએ

(પ્રતિનિધિ તરફથી) અમદાવાદ, તા. 30 જાન્યુઆરી, 2021, શનિવાર

ગુડ્સ એન્ડ સર્વિસ ટેક્સના બોગસ બિલ બનાવીને કરોડોની ઇન પુટ ટેક્સ ક્રેડિટ ઓળવી લેનારાઓ સામે ઇન્ડિયન પીનલ કોડની કલમ 467, 468 અને 471 હેઠળ બોગસ સરકારી દસ્તાવેજો ઊભા કરવા બદલ કેસ કરવામાં આવે તો બોગસ બિલિંગ કરનારને દસ વર્ષની જેલ થઈ શકે છે અને તેનો ગુનો બિનજામીનપાત્ર બની જાય છે.

તેને બદલે જીએસટીની કલમ 132 હેઠળ જ કેસ કરવામાં આવતા હોવાથી સરકારની રિકવરી પણ પૂરતી નથી આવતી અને ગુનેગારો એક બે વર્ષની સજા ભોગવી બહાર નીકળી જતાં હોવાના કિસ્સાઓ વધુ બને છે. તેથી બોગસ બિલિંગના કૌભાંડ પર બ્રેક લાગતી નથી. પરંતુ જીએસટીના અધિકારીઓ બોગસ બિલિંગ કરનારાઓ સામે ક્રિમિનલ કેસ કરવાનું ટાળે છે.

રૂા. 5 કરોડથી વધુની બોગસ ઇન પુટ ટેક્સ ક્રેડિટ લીધી હોય તો જ બોગસ બિલિંગ કરનાર સામે બિનજામીનપાત્ર ગુનો બને છે અને તેને સાત વર્ષની જેલની સજા થઈ શકે છે. લાંબી અને આકરી સજા થાય તો બોગસ બિલિંગ અંકુશમાં આવી શકે છે. તેમની સામે ક્રિમિનલ કેસ કરવાને બદલે જીએસટીના અધિકારીઓ જીએસટી એક્ટની કલમ 132 અને તેની પાંચથી છ પેટા કલમો હેઠળ જ કેસ કરે છે.

તેમાં બે, ત્રણ અને સાત વર્ષની જેલની સજા છે. રૂા. 5 કરોડથી ઓછી રકમની ઇનપુટ ટેક્સ ક્રેડિટ લીધી હોય તો તેવા કિસ્સામાં તેમની સામે જામીનપાત્ર વોરંટ જ નીકળે છે. તેથી તેઓ આસાનીથી જામીન મેળવીને નીકળી જાય છે. 

આ કેસને કારણે રિકવરી પણ વહેલી આવતી નથી અને બોગસ ઇનપુટ ટેક્સ ક્રેડિટ લેનારાઓ પર અધિકારીઓની ધાક પણ વધતી નથી. પરિણામે ડર વિના નવા નવા ફ્રોડ કરનારાઓ બોગસ બિલિંગ કરવામાં ઘૂસ્યા જ કરે છે. 

બીજી તરફ જીએસટીના અધિકારીઓ બોગસ બિલિંગ કરનારાઓ સાથે સેટિંગ કરી લેતા હોવાથી પણ તપાસ આગળ વધતીે અટકી જાય છે. એન્ટિ ઇવેઝનના એક અધિકારી કહે છે કે બોગસ બિલિંગ કરનારાઓ આર્થિક રીતે પગભર પણ ન રહેતા હોય તેવા લોકોના પુરાવાઓ મેળવીને તેમના દસ્તાવેજો મૂકીને જીએસટીનું રજિસ્ટ્રેશન મેળવી લે છે.

પરિણામે એક પછી એક સાત સાત લેયર સુધી જાય તો પણ મૂળ વ્યક્તિ સુધી પહોચી શકાતું નથી. પરિણામે મોટી માછલીઓ એટલે કે બોગસ બિલિંગના ખરા સૂત્રધાર સુધી પહોંચી શકાતું નથી.

બોગસ દસ્તાવેજો ઊભા કરીને બેન્ક ફ્રોડ કરનારને દસ વર્ષની જેલ થાય છે. પરંતુ બોગસ દસ્તાવેજ ઊભા કરીને જીએસટીની ઇનપુટ ટેક્સ ક્રેડિટની અબજોની ચોરી કરનારને આકરી સજા થતી નથી. આ ન્યાયમાં અસમાનતા ઊભી કરે છે. ત્રીજું, બોગસ બિલિંગમાં તપાસ કરતાં અધિકારીઓની તરફેણમાં વજનનો કાંટો ઝૂકી જાય તો તેઓ સરકારી આવકને ભોગે પણ સમાધાન કરી લેતા હોવાનું જોવા મળે છે.

DGGIએ દરોડો પાડી રૂા. 5.2 કરોડનાં બોગસ બિલ પકડયા

9 કંપનીઓ પરના દરોડામાં  રૂા.5.2 કરોડના માલ પરની રૂા. 68 લાખથી વધુની ITCનો મામલો ગૂંચવાયો

ડિરેક્ટોરેટ જનરલ ઓફ જીએસટી ઇન્ટેલિજન્સેનો 5.20 કરોડના બોગસ બિલ પરની 68 લાખની ઇનપુટ ટેક્સ ક્રેડિટનો મામલો ગૂંચવાયો છે. દરોડા હેઠળ આવરી લેવામાં આવેલી નવ કંપનીઓમાં આહિલ ટ્રેડિંગ, અન્શા ટ્રેડિંગ, ઇરાની ટ્રેડિંગ, કમલ ટ્રેડિંગ, ખૈબર ટ્રેડિંગ, એમ.એાર. ટ્રેડર્સ, ઓમેગા એક્ઝિમ, રાજાણી ટ્રેડર્સ, રૂદ્ર ટ્રેડર્સ જેવી કંપનીઓને આવરી લેવામાં આવી છે. તેમણે મળીને રૂા. 5.20 કરોડના બોગસ બિલ બનાવ્યા છે. તેના પર રૂા. 68, 60,981ની બોગસ ઇનપુટ ટેક્સ ક્રેડિટ લીધી હોવાનું પકડી પાડવામાં આવ્યું છે. તેના પર 15 ટકા પેનલ્ટી અને વ્યાજની માગણી કરવામાં આવી હોવાનું બહાર આવ્યું છે. તેમની સામે સિવિલ કેસ કરવામાં આવતો હોવાથી અધિકારીઓની ધાક બેસતી જ નથી.

from Gujarat News - Gujarat Samachar : World's Leading Gujarati Newspaper https://ift.tt/39zVqU0