ચુડામાં અજાણ્યા શખ્સોએ સગીર બાળકના અપહરણનો પ્રયાસ કરતા પંથકમાં ચકચાર

લીંબડી, તા. 19 ફેબ્રુઆરી, 2021, શુક્રવાર

સુરેન્દ્રનગર જીલ્લાના ગ્રામ્ય વિસ્તારોમાં ગુન્હાખોરીના બનાવો વધી રહ્યાં છે ત્યારે ચુડા તાલુકામાં વિદ્યાર્થીઓ સહિત બાળકોનું અપહરણ કરતી ગેંગ સક્રિય થઈ હોવાની લોકમુખે ચર્ચાઓ થઈ રહી છે ત્યારે ચુડા શહેરી વિસ્તારમાંથી સ્કૂલે જતાં એક સગીર બાળકનું અજાણ્યા શખ્સો દ્વારા અપહરણનો પ્રયાસ કરવામાં આવ્યો હતો પરંતુ લોકોએ બુમાબુમ કરતાં અજાણ્યા શખ્સો દ્વારા સગીર બાળકને આગળ જઈ છોડી મુક્યો હતો અને જે અંગે પરિવારજનો સહિત લોકો પોલીસ મથકે ઉમટી પડયાં હતાં અને કાર્યવાહી કરવાની માંગ કરી હતી.

આ અંગે સુત્રો પાસેથી મળતી માહિતી મુજબ ચુડા શહેરી વિસ્તારમાં રહેતાં એક સગીર બાળક સ્કૂલે જઈ રહ્યો હતો તે દરમ્યાન રસ્તા પરથી ત્રણ થી ચાર અજાણ્યા શખ્સોએ કારમાં આવી સગીર બાળકનું અપહરણ કરી લઈ ગયા હતાં જે દરમ્યાન બાળક સહિત આસપાસના લોકોએ બુમાબુમ કરતાં અજાણ્યા શખ્સોએ બાળકને આગળ તરફ જઈ કારમાંથી ઉતારી નાસી છુટયાં હતાં જ્યારે આ અંગેની જાણ ભોગ બનનાર બાળકે પરિવારજનો સહિત લોકોને કરતાં મોટીસંખ્યામાં ચુડા પોલીસ મથકે લોકોના ટોળેટોળાં ઉમટી પડયાં હતાં અને બાળકનું અપહરણ કરનાર શખ્સોને ઝડપી પાડવાની ઉગ્ર માંગ કરી હતી. પરંતુ પ્રથમ તબક્કે પોલીસ દ્વારા આ મામલે ફરિયાદ દાખલ કરવા આનાકાની કરી હોવાનો આગેવાનોએ આક્ષેપ કર્યો હતો જ્યારે ચુડા તાલુકામાં એક અઠવાડીયામાં બે બાળકોના અપહરણનો બનાવ બનતાં પોલીસની કામગીરી સામે પણ અનેક સવાલો ઉભા થયાં હતાં. જ્યારે ચુડા તાલુકામાં બાળકોને અપહરણ કરતી ગેંગ સક્રિય થઈ હોવાનું ચર્ચાઈ રહ્યું છે અને બાળકોના અપહરણના બનાવો વધી રહ્યાં છે ત્યારે પોલીસ દ્વારા આરોપીઓને ક્યારે ઝડપી પાડવામાં આવે છે તેના પર સૌની મીટ મંડાઈ છે.

from Gujarat News - Gujarat Samachar : World's Leading Gujarati Newspaper https://ift.tt/3qyp2ay