બલદાણા ગામના પાટીયા પાસે હોટલમાં વિદેશી દારૂ ભરેલું આઇસર પકડાયું

સુરેન્દ્રનગર, તા.21 ડિસેમ્બર 2020, સોમવાર

સુરેન્દ્રનગર જિલ્લામાંથી પસાર થતાં અમદાવાદ-રાજકોટ નેશનલ હાઈવે સહિત મુખ્ય માર્ગો પર બુટલેગરો દ્વારા દિન-પ્રતિદિન ઈંગ્લીશ દારૂની હેરાફેરી અને કટીંગના બનાવો વધી રહ્યાં છે અને ૩૧મી ડિસેમ્બરની પાર્ટીને ધ્યાને લઈ બુટલેગરો દ્વારા ઈંગ્લીશ દારૂનો સ્ટોક કરવામાં આવતો હોવાની બાતમીના આધારે જિલ્લા પોલીસવડાની સુચનાથી તથા ડીવાયએસપીના માર્ગદર્શન હેઠળ વઢવાણ પોલીસે નેશનલ હાઈવે પર પેટ્રોલીંગ હાથધર્યું હતું.

જે દરમ્યાન વઢવાણ ગ્રામ્ય વિસ્તારમાં પેટ્રોલીંગ દરમ્યાન બાતમીના આધારે રાજકોટ-અમદાવાદ નેશનલ હાઈવે પર બલદાણા ગામના પાટીયા પાસે આવેલ આશાપુરા હોટલના મેદાનમાં એક આશયરમાં ઈંગ્લીશ દારૂ હોવાની બાતમીના આધારે રેઈડ કરી હતી જેમાં આયશરમાંથી ઈંગ્લીશ દારૂની અલગ-અલગ કંપનીની બોટલો નંગ-૩૧૮૦ કિંમત રૂા.૧૦,૭૫,૫૦૦ તથા બીયર ટીન નંગ-૩૬૦ કિંમત રૂા.૩૬,૦૦૦ તથા મોબાઈલ ફોન નંગ-૨ કિંમત રૂા.૧૦,૦૦૦ તથા આયશર કિંમત રૂા.૧૫,૦૦,૦૦૦ મળી કુલ રૂા.૨૬,૨૧,૫૦૦ના મુદ્દામાલ સાથે બે શખ્સો પ્રવિણ ઉર્ફે કાળા રમેશભાઈ ગૌડ ઉ.વ.૨૩, રહે.પનીહારી હરીયાણા તથા નવીન કુલદીપ પાનુ ઉ.વ.૨૬, રહે.મદીના હરીયાણાવાળાને ઝડપી પાડયાં હતાં.

જ્યારે બંન્નેની વધુ પુછપરછ કરતાં ઈંગ્લીશ દારૂનો જથ્થો પહેલવાન નામના વ્યક્તિએ મોકલ્યો હોવાની કબુલાત કરી હતી આથી પોલીસે મુદ્દામાલ સહિત બંન્ને આરોપીઓને ઝડપી પાડી વઢવાણ પોલીસ મથકે ગુન્હો નોંધી વધુ તપાસ હાથધરી હતી. આ રેઈડ દરમ્યાન જિલ્લા પોલીસવડાની સુચનાથી તેમજ ડીવાયએસપી એચ.પી.દોશીના માર્ગદર્શન હેઠળ વઢવાણ પીએસઆઈ ડી.ડી.ચુડાસમા સહિત સ્ટાફના પ્રદુમનસિંહ, મહાવિરસિંહ, રોનકભાઈ, જયપાલસિંહ, બળદેવસિંહ, સહિતનાઓએ સફળ કામગીરી કરી હતી.

from Gujarat News - Gujarat Samachar : World's Leading Gujarati Newspaper https://ift.tt/2WHqAl7